गोरबोली भाषेतील - कविता

 नमस्कार,

   येथे आपणास गोरमाटी  ( गोरबोली -बंजारा ).. कविता वाचता येतील

 👇

सोसेर अन पोसेर

......................

एक डोकरा 

रोप लगायो 

जतन करन 

झाड बणायो. 

पखेरु आयं 

कलबल करीय 

आते जाते लोक 

छेंडीम बेसीय

आसो सपनो 

डोकरार मनेम......

 

एक दन 

आसो आवगो

ओ रोपेन

 वाढ लगायेवाळो 

झाड बणायेवाळो

डोकरा  समागो....

लोक हळहळ किदे 

झाड डोकरार यादेम 

दी दन फुंदा गाळो

अन अणाचकी वळवळो 

एकदन झाडेन 

दी फाटा फुटगे 

लोकून वाटो 

झाड उभारी लेरोछं 

चॅरीवडी फेलरोछं 

 

फाटा फुटगे

आभाळेसामू वदगे 

हावार झोकाम 

खुशीती डोलगे 

 पाने फुलेसी 

आणदेती सजगे......

लोकून घणो आणदं व्हेगो 

पखेरु आन  

कलबल करेलागे

आते जाते लोक 

छेंडीम बेसेलागे

डोकरार  सपनो 

पुरो हेगो.

 हेटं झाडेर जडेन 

आणदं हेगो ..

अन् उचं  फुटे जे फाटाम 

गर्वेर हवा भरागी. 

दोयी फाटा मोठपण 

मिरायेलागे..

आतेजाते पखेरु 

अन् वाटकरीन 

आपापणे सामू 

बलायेलागे....

हावार झोकेम 

आपसेम लढेलागे 

म मोठो, म मोठो 

आसी वाते करेलागे 

लोक कटाळगे 

पखेरु टाळो खायेलागे 

झाडेर जड 

समण घाली ....   

मं येनूर वास 

हेट भाटा फोडन 

पाणी धुंडूछू 

अन येनून जगावूछू....

ये आपसेम लढरेछं 

मोठ्यायिकी मिरारेछं...

जड ओ दनेती 

पाणी सोसेर अन पोसेर छोडदिनी ..........    !!!!!!

    ©️®️✍️एकनाथ गोफणे

.....................................................आभाळ  तयारी..

---------------------

झडगे पान 

सुकागो रान

भूलागो ध्यान, 

कनातरी... 

तडकेर झळ 

आटगो जळ 

मनेम तळमळ, 

जीवेरी...

कना जमीय मेघ

कना उतरीय धार 

मन जोवरोछं वाट 

एक एक बुंदेरी...

 धरती हारीभरी

दिखायं घणी भारी 

ओन सजायेर कररो 

आभाळ तयारी....

---------------------

.......✍️🌱एकनाथ गोफणे

लढो

म महाराष्ट्र
आज साठ वर्षेर हेगोछू

ये साठ वर्षेम
मार दी बणजारा
आछी काळजी लिदे.

ऊ वसंता
तो घणोच हिंमतवान हेतो.
मराठी राजकारणी हेतो.
मन धेन छं
तांडेरो वसंता
5 डिसेंबर १९६३
ये दन
मा.ना.मुख्यमंत्री
वसंतराव नाईक बणगो
तो मार हिवडा आणदेती
नाचेलागो. ओर रुपेम
तांडेपेडेन, वाडीवसातीन
सेन सायी हेयवाळो
पुरोगामी विचार मार
राजगादीपर आवगो...

एक कृषितज्ञ अन
महाराष्ट्र राज्येरो तिसरो
जास्त दन मन
अन मार राजकारभार
सांभाळेवाळो दमदार
हिंमतवान मारो खरो
महानायक......

ओर बाद वजीक घडी पलटी
अन
सुधाकरराव
२५ जून,  १९९१ ये दन
मुख्यमंत्री बणगो...

आज साठीम
होटो फरन देखूछू

तो ये दि लाल
मन घणे कमालेर
वाटछं.......

आज वाट जोवरोछू
आसोच कोयी
बणजारा रो
हिंमतवान, कल्पक
सेन सायी हेयवाळो
विचार लेन कोयीतरी आयं
मा. ना.मुख्यमंत्री बणजायं.

बणजारा मुख्यमंत्री
बणजायं करन
कररोछू आशा.....
तम बी आपसी वणशी बिघडी
छोडो...
मार सपनो पुरो करे वास
लढो..........

✍️✍️एकनाथ गोफणे...
@स्वच्छंदी भरारी
.......

*नसाब*

काम छेनी तो
 आब कांई करु
लावण वदडन
ओनच भरु
असोच काम छ
जगेम सुरु...


आश्वासनेरो रोज 
दौडरो छं घोडा
सारी हेन ओर लार
धासरे छं भडा....

एकी छेनी करन
भरारो छ खोडा
तिकिटे पुरता
धुंडरे छं जोडा.

एक जाग बेसो 
अन करो नसाब
ताकद वतायेर
वेळ आवगी आब...

गली गली हिंडो मत
पाडो मत फाटा
इ अवस्था समाजेर देखन
 सेवा फोडल्य ओर माथो ,
हातेम लेन भाटा...........
✍✍✍
✍©®
*Eknath GOFANE*................................

  'नायक बणेर छ'
देख बेटा,

     आपणेन कोई वळखतेते कोनी

•      आपणेती कोई बोलतेते कोनी

    आपण बोला गोरमाटीम,
   तो , सारी हासतेते
आपणो जगणो , कोईच
समजन लेतेते कोनी
ओनूर भाषाम , संघर्ष आपणो
लकतेते कोनी .........
पेनार दनेम, जंगल खोळा हिंडतेते
हिंमतेती चालतेते,
निसर्गेर रंग देखतेते,
वाघेती लढतेते,
साळ्यार ढंग वळखतेते...
पण  बेटा
आज समीया बदलगो
तरी ,आज वाघे सरीखोच लढेर छ,
लबाडेर ढंग वळखेर छ.
आपणो दुख आपणीच
लकणीम मांडेरछ...

कर्म करेवाळो
'हिंमतवान सेवा ' बणेर छ.
खूप शिकन एकदन
' नायक ' बणेर छ.

करन केरो छू, बेटा
आळस छोड ,
सेवा विचारेती 'मनेर तार जोड '.
बुद्धीर वजाळेती, सोताच
सोतार जीवनेम ' दिवो ' लगादं....
सोतार जीवनेम ' दिवो ' लगादं....
.........
रचना : एकनाथ गोफणे

कोईच  रोखं कोनी 

_________________________

तू यशस्वी बणेरच वात

जर तार मनेम पक्की छ

तो , तोन कोईच 

रोखं कोनी.........

कुण कांई केरो छ

ये वातेम , पड मत

तार प्रगतीर वेग 

कमी मत हेयदं.........

आयं खूप समस्या 

संकटेन सोबत लेन

पण तू ओनुन 

समस्या अन् संकट

न समजता तार 

प्रगतीर मार्ग समज.....

तार कल्पना अन 

तार विचारेर

तोन कायम साथ छ...

तार मेंदू सजग छ,

कृतीशिल छ, करनच 

यशस्वी बणेरच वात

 तार मनेम पक्की छ ......

✍✍ Eknath GOFANE ekgof2015@gmail.com कोनी*

_________________________

तू यशस्वी बणेरच वात

जर तार मनेम पक्की छ

तो , तोन कोईच 

रोखं कोनी.........

कुण कांई केरो छ

ये वातेम , पड मत

तार प्रगतीर वेग 

कमी मत हेयदं.........

आयं खूप समस्या 

संकटेन सोबत लेन

पण तू ओनुन 

समस्या अन् संकट

न समजता तार 

प्रगतीर मार्ग समज.....

तार कल्पना अन 

तार विचारेर

तोन कायम साथ छ...

तार मेंदू सजग छ,

कृतीशिल छ, करनच 

यशस्वी बणेरच वात

 तार मनेम पक्की छ ......

✍✍ Eknath GOFANE ekgof2015@gmail.com

जीवन भटक्यार

जत वत भिया
चालरो छ लढणू
केन कांई केणू
अन्  कुकरेन रेणू

मान पान सत्ता सारु
सारी वडी झगडो
सदविचार छेनी करन
माथो हेगो उघडो

सट्टा, पत्ता दारुरो
आयो महापूर
तांडेर दुष्काळ देखन
डोकरी डोकरा झुरं.

साटार पाचटेम,
 दिवो दिवाळीर
कोयतार संगतेम
चालं ,रमती होळीर

सुधारणारो करा
मनेम विचार
जीवन भटक्यार
आबं  करा स्थिरं...


©✍ ekgof2015@gmail.com

Eknath GOFANE







        
                स्वाभिमानी बणजो

विलेक्शन आरोछं

कन  कन

कार्यकर्ता पेक्षा

नेताच फररे छ

 रोज गनगन

नेतार मातेम

कररो भुंवा भनभन

सारी खेळ देकन

हासं सारी जनमन



कोई नेता काढरे जत्रा

कोई भरारे मळाव

कोई वजारे, नगारा ढोल

कोई बोलरे , मिठे बोल..



कोई लाय साडी , पचेडी

कोई दिय धोतीर जोडी

तांडे सामूआयं, सारी

धाटन रुडी रुडी


कोई  खराय , पराय

कोई सपनो वताय

मतदानेर दन तम

स्वाभिमानी बणजो

कोई पिसा मत लिजो

लोकशाही बचावो

पण एजंट मत बणजो.





............. ✍✍✍✍
*ekgof2015@gmail.com*
Eknath Laxman Gofane

वसंता

वसंता तारो आत्मविश्वास
प्रेरणा छ मारी
शिक्षणच करीय
समाजेर विकास
इ वात छ खरी...........


तू तळपतो सूर्या छी
तांडो तांडो जगायेवाळो
तार विचारेर आसरो लेन
तांडो  छ  आब  बदलेवाळो.........

माफ कर महानायक
तार फोटू लेन ,डिजे लगान ,
         मन नाचतू आयेनी...
कारण मन फक्त
तोन वाचतू आवछं...
म वाचू छू, तार वात पुस्तकेम
समजन लूछू तार निती
कारण ओमाईच दिखछं
मन मार प्रगती .....................

          Eknath GOFANE