गोरबोलीतील कविता

गोरबोलीतील कविता

*एक तांडेम*..

  तांडेर सारी
 जवान छिच्यापर
एक जाग आये
विचार करन,
थोडा माथो चलाये.

तांडेमाई  हेगे
अतिक्रमण भारी
कोई मेलरे भाटा
कोई घालरे ,
बकरीर खुटा
कोई बडारे ,
साडेतीन फुट वटा
रोडे पर भिया
कोई  वकल्डा  नाकरे ,
कोई केरीच वात
कोनी सामळरे

ई तकलीप दूर करे करता
एक तांडेम
तांडेर सारी
जवान छिच्यापर
एक जाग आये
 पंचायतीम देये करता
एक कागद बणाये
झामी डोकरीर
लिदे अंगुठा
तोळ्या डोकरा किदो
मोडी म सही
सही, अंगुठाती
कागद भरागो
छिच्यापरेर मळाव
कागद पंचायतीम लेगो

कागद वाचन सरपंच
अतिक्रमण काडेर
वात किदो,
जेर अतिक्रमण हटरेते
ओनुर गाळी खादो...

सरपंच बोलो सारीन
तांडेर सारी
जवान छिच्यापर
छ मारे सोबतेन
तांडो आचो करेर छ
साथ दियू ओनून

जेर दुखरीती भिया
ओ किदे कटकट
अतिक्रमण हटो जदी
तांडो हेगो चकाचक
नाराज लोक
ई बदल नजरेती
देखरेते  टकटक ...
          ...............
   ✍©  *एकनाथ गोफणे*




सात जनम
..............


डोकरा मुंडेन
मुस्का भांदो
चलम पियेर
हेगो वांदो
डोकरीन केरो
फलाणी कांयी
रोग आयो गंधो......

डोकरी केरी
छगीयार बाप
वात सणलं मारी
छोडदं चलम आबं
मोको आयोछं भारी

तू चलम पिवछी
तरास हेवं मन
धुकळ तू छोडीछी
ताण मारे मातेनं...

तू केरी छी
आची वात
तो छोड दूछू
आजेती चलम.
पण हानूच
साथ देस मन
आगले सात जनम.
---------
✍️एकनाथ गोफणे..