गोरबोली साकी.. गोण्णीर ऑनलाईन बजार, धणी हेगो बेजार.

 गोरबोली साकी

गोण्णीर ऑनलाईन बजार, धणी हेगो बेजार. ....

मालीबाई ,पुरे तांडेर  माहिती केंद्र हेती. केर जमरो ,केर तुटरो, सगाई, विया नातरा, लेणी देणी, तंटो झगडो राजकारण सारी वात मालीबाईन मालम हेती. 

भोळेबाळे तांडेवाळेन, भायार नामेती सोगन खरान   मतदानेर  पिसा वेटेनवाळे  लुच्या कटामेर लोकून सुदोसट गाळी देतीती. ओर धाकेती लबाड नेता, फुकट्या कार्यकर्ता, तांडेम, पक्षेर झेंडा अन पाटीर उद्घाटन करेन घबरातेते.

   तांडेर ग्रामपंचायतीर पुढारी ईमानदारीती काम करतेते.  ग्रामसभाम मालीबाई, तांडेर सुधारणा करेर मुद्दा लेन बोलतीती. 

   मालीबाईर हिमतेशी तांडेर बायी बापडी ग्रामसभाम हजर रेन, समाजेर समस्या मांडतीती. आज लिंबेर झाडेहेट बेसन , लावण भरती भरती मालीबाई सुंदरी डोकरिती वातचीत कररीती.

 सुंदरी डोकरीर एकच छोरा हेतो. ओर वियान दी साल  हेगेते. धामडी तांडेर दला पालतियार छोरी सुंदरी डोकरीर बोडी बणन संसार कररीती. सुंदरी डोकरीर छोरा, वाडीलालभियार आश्रमशाळाम वसतिगृह देखरेख करेर नोकरीप हेतो.  तांडेकन शाळा हेती. सुंदरी डोकरीर दी एकर वाडीलालभिया लिदो, अन ओर छोरा नोकरीप लागो.उरगो जे तीन एकर खेत 'गबरु' डोकरार छोरा 'संजू'  निमबटायीती करतोतो. छोरा भासू र पगार, खेतेर माल आयेर कारण सुंदरी डोकरी आणदेती जगरीती. भासू आश्रमशाळार  छिछापरेवास लाव जे भाजीपालेमायीती रोजेर लंगाणेर सोय हेजाव. जेती भासूर गोण्णी सविता मजाम संसार कररीती.    

   रोज लिंबेर झाडे हेट बेसन , हारद आवं जे गीद बोलतू बोलतू लावण भरेर काम मालीबाई  करतीती.ओन देकन तांडेर बायी बापडी  हादो  आवरन लावण भरेन आ जावं.  बोडी बेटी लावण भरेर सिकेन आ जावं.  

"का बाई, सवितान मायरेन  पुचादिनी कांयी?"

मालीबाई सुंदरीबाईन ओर बोडीर बारेम पुचेलागी.    

   "कोनीये मांदी, घरेम छं. ठामठिकर घसरी ह्य.ओन मायरेन पुचादू ,अन आत चुलोचाकी कुण करं. मारेती हेयनी मालीबाई आबं. तार देवर हेतो,जदी येलाकसालाती गंज राबलीदी संसारेवास.आबं सकेर घडी आयी तो ,तार देवरेन लेगो भगवान.ओर माया ओनज कळं ".

सुंदरीबाईर वात सामळन, मालीबाई बोली, " कांयी करीया, भगवान रकाडीय वसो रेणू लागछं. मन कांयी वाटो तार बोडी दिकारी कोनी, वियान दी साल हेगो, बाळतपणेवास मायरेन चलेगीक कांयी. "

"कोनी जारी ऊ. वजी दी वरस छिच्यापर कोनी वेयदू कछं '' सवितार वात, सुंदरीडोकरी मालीबाईन केनाकी.

"याडीये याडी, तार भासूर लारेशी छे मिना विया हेव जे ,नामा भियार पोतेर 'धुंड' छं आपकाण. अन तार बोडी वजी दी वरस छिच्यापर कोनी वेयदू कछं" सुंदरीबाई, पोती पोता हेगे तो घर गोकुळेनायी बणजाव छं."

"मालीबाई तू खर वात केरी छी,पण आबेर बोडी बेटी मुंड्यांग बोलतू आयेनी. मनेर राजा छ वो.आपणो कांयी धकेवाळो ये बाई"  सुंदरीबाई ओर कडापो मांडदिनी.

  " मा, सविता ऑनलाईन बजार करु करछ. भासू नेनकियानं निरा बेजार  करनाकीछं"

 मंजुळार बोडी 'भारती' लावण भरती भरती मायीच बोलपडी.

"का भारती, तोन बी तार सासू मंजुळानायी आदेमायीच भिंडाकतरेर लत लागगी कांयी " चचमार काचेर उपरेती भारतीसामू देकन मालीबाई बोली.अन मंजुळार बोडी 'भारती'  गचप बेटगी.

      बोडीर ऑनलाईन बजारेर वात आब मुंड्यांगच आवगीछं,तो आबं जपाडेर का ? हानू मनेम विचार करन सुंदरीडोकरी बोली,"मालीबाई, म तो कटाळगी सविताशी. पण भासू बी किदरागो छं. हाप्ताम तीन दन, दोपेर छोरा, साळार काम छोडन ,सवितार बजार लेयेवास जावं छं. यी मावली ओर फोनेम लक दछं. साडी, झंपर  बंगडी ,लाली,चपला, गंध, टिकली पावडर, भांडा, बासण  देमेलो. रांडरुंड्या ओर बाप,  दादा बेसेछं वतं. देमेलंछं लगेच.मार छोरा  हाप्ताम तीन दन, दोपेर वणा साळार काम छोडन ओर बजार लेयेन धासछं. एकांदी दन जल्दी न लायो तो, मावली मुंडो चडान बेस जावं छं."

     सुंदरीडोकरीर कडापो सामळन मालीबाई बोली, "जायेदं सुंदरीबाई ,सवितार याडीबाप देमेलरेछं फुगट फागट तू टेनसल मत लं मांदी" 

"कसेर फुगट फागट ये मालीबाई, भासूर बँकेमायीती   पिसा कटा जावछं. ये मावलीर पगेती,बिचारेर पगार कमी अन वदारी जास्ती हेगीछं.गोण्णीर ऑनलाईन बजार अन धणी हेगो बेजार. आसी गत हेगी मार भासूर.  म परमेदन की ,सविता  मार 'पचेडी' फाट गी छं, एक नवी मंगा लं . तो  लांबो  मुंडो करन केवं छं कशी,माँ  ओ लोक 'पचेडी' वेचेनी .  वू  सिंगदेर सुरीया डोकरा, नाक घसडतो आयोतो, सुंदरीबाई,मार भाणजीन, तार बोडी बणालं करन. म बी कांयी देकी, नातेगोतेम छं. निबजायं सगासेणी.करन 'हा' भर लिदी.  तो यी मावली आसे रंग वतारीछं.

  "जायेदं सुंदरीबाई, आबं  छडी छं वू, छिच्यापर हेजायं,डिलेप संसार पडजायं तो आपीच सदर जायचं."

सुंदरीडोकरीन आधार देतू मालीबाई बोली. 

   "मार रिस ओपर छेनी मालीबाई. मार कांयीकेणू छं. मार बोडी जे जनस मंगावछं वू तम देमेलोछो.

पच, मार सरीक डोकरी हेन, पचेडी, फेटीया, काचळी  आपणो बानो जर मंगायी तो छेनी को जो. पच तमार कंपनीन कांयी आंगार लगावा कांयी."  

 सुंदरीडोकरीर वात सामळन,  मालीबाई हासती हासती बोली, ये बाई, पचेडी, फेटीया, काचळी ,आपणो बानो ओनून कोयी बणान पुचाते कोनी ह्य.तो ओ  लोक कतेती पुचायं. आपण एक काम करा, आपणे तांडेर बायीबापडीन काम मळजायं, ओनून पिसा मळीय.संसारेन हातभार लागीयं येर वास. आपणच आपणो बानो बणान, तार बोडीन लगान वेचा. 'ऑनलाईन बंजारा बानो बजार' चालू करेन लगावा. आपणो बानो,आख्खे जगभरेम पुचावा. समाजेर विकासाने हातभार लगावा. 

लिंबेर झाडेहेट बेसन , लावण भरेवाळी सारी तांडेर बायीबापडीन   मालीबाईर वात पटगी.

सुंदरी डोकरी खुश हेगी.

 ..............................

✍️

लेखक:- एकनाथ लक्ष्मण गोफणे. 

चाळीसगाव ----   8275725423