पंचायतीर टूर.

पंचायतीर टूर


आरो छं मार्च एन्ड
निधी पडो छ भरपूर
मेंबर केरो सरपंचेन
काढा कती टूर.......

अभ्यास दौरा र नामेती
मिटींगेम ठराव किदे
शांती मेंबरणीर हास्यान बी
गाडीम घाल   लिदे .......

नळ चालू करेवाळो
गबल्यार, 'उम्या ' बी आवगो...
ग्रामसेवकेसोबत , शिपाई अन
क्लार्क बी गाडीम बेसगो.....

जामा सायबेर सऱ्या
डेपूटी सरपंच हेतो
सरपंच डोकरीर मदया
पुढारीर कपडा घालन बेसोतो....

निकळी गाडी दूर दूर
अभ्यास दौरार टूर टूर
 गाम -तांडेर गुरुप ग्रामपंचायतेर
पिसा खाते म हेते भरपूर....



आदे गोर आदे कोर
सारी मेंबर बेसेते गाडीम .
कांई कांई देकेर,
कतकत फरेर
नियोजन किदे गोडीम ...........


देवधाम किदे, अन
धरणे पर काढे सेल्फी
थंड लागरी तरी बी
खादे मजाम गुल्फी

मस्ती मस्तीम दनभर फरे ,
खुटगी बाटली जना सांजवणा हारे
मस्त 'ढाब्यावर गाडी थांबरे '?
करन चालये वाळेन केरे.........

ऑर्डर दिने भारी भारी
फिको रस्सो, सोबत
एक वाटी तरकारी...
निंबू कांदारी जोड भारी.....

कोई मंगाये विदेशी ,कोई पिदे देशी
घरेरच भारी  रेवं छं  करन
हास्या लायो सोबत
धाऱ्यार घरेर गावठीर शिशी ............


मोठो टेबलं लगाये
फ्रॉय पापड मंगाये
चकाणान काजू सोबत
 मच्छी फ्राय मंगाये........

खाये पिये वाळेन
थंडी हवाम चढगी
डळी ढाबार भगोनीम शिजगी
अन राजकारणे वात चालगी......

जामा सायबेर सऱ्या बोलो
मदया याडी छ सरपंच
 अन म छू डेपूजी
हाम दोई छा राजी
तम करो हाजी हाजी......

गरामसेवक केवं
अरे मराठीत बोला
कोण काय बोलतं
काहीच समजत नाही मला ...


 क्लार्क बोलो, भाऊसाहेब
तुम्ही नो टेंशन  खा पोटभर
मी लिहीन हिशोब , बरोबर
तुम्ही सही करा चेकवर............

हवा हेती थंडी ,
वातावरण हेगो गरम
फुकटेर पिसाम खादे पिदे
छोड दिने लाज सरम....


गामतांडेर राजकारण
ढाबार टेबलेप आवगो
गोर_ कोर मेंबरेर
झगडो चालू हेगो...

वेटरेन आयो टेंशन
धासन गेव मालके कन
तीन नंबर टेबल वर
दांगडो सुरु झाला
कोन काय बोलतो
हे समजत नाही मला....

गडबडेम, शांतीर धणी
हास्या चाबरो डळी
भुको मररो छी करन
डेपुजी ओन देरो गोण्णीर गाळी

आयो धासन ढाबा मालक
केय लागो, कुठे गेला गाडी चालक ?
माझं बिलं पेड करा
अन निघा ,पटकन रस्ता धरा .

ड्रायव्हर गाडी किदो स्टार्ट
रात वतारो कन्नड घाट
ग्रामसेवक बोलो , ड्रायव्हर भाऊ
तू होता शाकाहारी
म्हणून आम्ही सुखरुप आलो घरी.....

ड्रायव्हर जोडो हात ,
अन बोलो एक वात
लायकी छेनी तरी ,
मोठे गोतवाडाती, पद मळो तमेन
रकाडो जरा ओ पदेर सन्मान......

प्रामाणिक काम करन तमार
गाम तांडेर, बदलावो नूर
तमार गाम तांडो देकेन
सारी जग आयं
कष्टेर पिसाती काढन टूर.......
________________

*Eknath Laxman Gofane*
ekgof2015@gmail.com